عشق مو تونی غیر تو نی گل من دنیا

عشقِ مو تونی غیر تو نی گُل مِنِ دنیا
ایخوم که به غیرِ تو نبو درد مداوا
ایخوم که بدونی دل مو بِی تو یه رنگِ
ایخوم که بدونی دل مو سی تو چه تنگ

بِی خرس زلالم شُو وُ رو نومته گفتم
هی طعنه وَ ایی مردم نامرد شنفتم
چوو کردنه غیرِ دل مو بِی دگرونی
سی غیر مو هر رو بخدا دل نگرونی

ایی ایل خو نونن که مو بیِ عشق تو گیرم
غیرِ تو مو یاری نِگرُم تا که بمیرم
تا روز قیومت تیلوم رهیله پایه
ایشینه دلم تا که وَ ره گل  مو بیایه

بِی هر نفسم مِن بُتِ خوم نومته ایگوم
بِی هر نفسم ایره وُ یا عشقته ایخوم

بِی عشق تو ایگیره دلم جون دوباره
بِی سر مو ایام سی طرفت بِی یه اشاره

سرگشته
#سهراب_عرب_زاده