عاشقی درد بدی بی که و جونم افتا

عاشقی درد بدی بی که وَ جونم اُفتا
اسم تو روزم و شو ورد زبونم افتا

تش عشقت منه لارُم مونه جوش آورده
مث اوو مونده ی پَس سد که خروش آورده

مثه دالوی کَری کهِ کُر سربازش مُرد
خبرش هوش وَ دل غم زده ی دالو بُرد

خبرت اومه که بُی یار جدیدی رهتی
حال و روزِ مونه بُی غصه که دیدی رهتی

عاشقی درد بدی بی که وَ پا انداتُم
کُم سِرو ایکنم و باز هنی دِنداتُم

تو بگو بعد تو بُی خَرس زلالُم چه کنم
بُی دلِ سوهته و بِرشیده بتالُم چه کنم

چه کنم بُی دِلِ خوم بونته وَم ایگیره
نصفه شو اییره بیابون و وَ غم ایگیره

عاشقی درد بدی که مونه خوارم که
بیرزِی مِن دِهِنِ مردُمِ بازارم که

تو نخواسی که بنی دهسته مِن دهسله مو
مثه ایی شُر شُرِ بارونه هَمِی خَرسَله مو

بعد تو بُی گپ و بُی نیشله زنگل چه کُنُم
بی تو هم مِن وسط گرگ و پلنگل چه کنم

عاشقی درد بدی بی که دچارم کردی
رهتنت بار بدی بی که تو بارم کردی

وسطِ مردمِ ایی ایل تو خوارم کردی
خنجرِ زهره وَ مِن پهنه ی لارم کردی

عاشقی درد بدی بی که اسیرم کردی
عاشقت بیدم و رهتی مونه پیرم کردی

مونه پس زِی که بری خورد و خمیرم کردی
مِن سراشیبیِ تندی سَرِ زیرُم کردی

عاشقی درد بدی بی که وَ جونم افتا
اسم تو روزِم و شو ورد زبونم افتا
سرگشته
#سهراب_ عرب_زاده